Месяц: Декабрь 2023

Опубликовано

«Үрүҥ Уолан» СК-гэр Чочу нэһилиэгэр Үлэ сылын түмүктүүр «Итоги года- 2023» диэн ааһан эрэр сыл үтүө үлэлэрин бэлиэтиир, нэһилиэкпит үлэһит дьонун, көхтөөх түмсүүлэрин, бастыҥ спортсменнарын чиэстиир улахан киэҥ тэрээһин буолан ааста.

Кулууп иһэ лыык курдук киһинэн туолбута бу дьоро киэһэбит нэһилиэкпитигэр интэриэһи тарпытын туоһута буолла. Өрөспүүбүлүкэ, улуус, нэһилиэк наҕараадаларыгар, бэлиэлэригэр, грамоталарыгар, бастыҥ номинацияларга тиксибит дьоммутун тобус-толору зал ытыс тыаһынан, ыһыынан-хаһыынан уруйдаан олус үчүгэй өрө көтөҕүллүү балаһатыгар үктэнэн аастыбыт.

Бүгүҥҥү күн дьоруойдарыгар бука барыларыгар эйэҕэс эҕэрдэбитин кытта өссө үрдүк ситиһиилэри баҕарабыт! Кэлэр сыл өссө атын саҥа ааттары таһаардын, үтүө түмүктээх үлэлэри үксэттин!
Опубликовано

«Үрүҥ Уолан»СК-гэр И.М. Гоголев-Кындыл аатын сүгэр Чочу орто оскуолатын коллектива “Учуутал уонна уһуйааччы” сылын түмүктүүр тэрээһини үрдүк таһымҥа ыытта.

Нэһилиэкпит инники кэскилин үөрэх-билии суолугар такайар үөрэхпит кыһатыгар кэлэр сылга өссө үрдүк ситиһиилэри баҕарабыт!
Опубликовано

Сылы түмүктүүр Бүлүү улууһун спортсменнарын чиэстиир «Бал чемпионов» диэн улахан тэрээһиҥҥэ биһиги нэһилиэкпит чулуу спортсменнарын ааттара ааттаммытынан киэн туттабыт

Остуол оонньуутугар быйыл «Саха сирин маастарын» нуорматын толорбут Илья Егорович Николаев «2023 сылга Чочу нэһилиэгин бастыҥ спортсмена»аатын, ытыыга Россия маастарыгар кандидат Мария Семеновна Догоюсова «2023 сылга Бүлүү улууһун бастыҥ спортсмена»аатын уонна «Саха сиригэр физкультурнай хамсааһын 100 сыла» бэлиэтин тутан үөрүүлэрин үрдэттилэр . Улуус нэһилиэктэрин ыккардыларыгар ыытыллыбыт комплекснай спартакиада түмүгүнэн Чочу нэһилиэгэ иккис миэстэни ылан администрацияҕа спорт специалиһа Николай Мартович Прокопьев быйылгы сыралаах үлэтин үтүө түмүгүнэн буолла. Бүгүҥҥү тэрээһин бастыҥнарыгар уонна Чочубут нэһилиэгин аатын араас таһымнаах күрэхтэргэ көмүскээбит спортсменнарбытыгар бука барыларыгар-Уруй-Айхал! Кэлэр сылга өссө үрдүк ситиһиилэри кэтэһэбит!

Опубликовано

Нэһилиэк түөлбэлэрин хамаандаларын саахымакка күрэҕэ

    Түөлбэлэр икки ардыларыгар икки күннээх сытыы киирсиилэр кэннилэриттэн саахымат күрэҕэр:- 1. Туойдаах 2. Байылыат 3. Саһарҕа, онтон дуобат күрэҕэр: 1. Туойдаах 2. Байылыат 3. Күндэ түөлбэлэр ыллылар.
    Миэстэлэспит түөлбэлэргэ эҕэрдэ эйэҕэһэ! Кыттыбыт спортсменнарга бука барыларыгар махтал бастыҥа! Эһиилги күрэхтэргэ олох эрдэттэн бэлэмнэниҥ!Өссө тыҥааһыннаах сытыы киирсиилэри кэтэһэбит! Күрэхтэһии түгэннэриттэн Н. Прокопьев, Р. Иванов хаартыскаҕа түһэриилэрин киллэрдибит.
    Опубликовано

    «Үлэ-олох тутула»

    Саха сиригэр уонна нэһилиэкпитигэр биллэриллибит Үлэ сылын чэрчитинэн Тыа хаһаайыстыбатын күнүн бэлиэтиир "Үлэ-олох тутула"тэрээһини түмүктүүр үөрүүлээх киэһэҕэ Чочу нэһилиэгэр кэтэх хаһаайыстыбаларыгар сүөһү-сылгы ииттэн аһы-үөлү дэлэтэр биирдиилээн ыалларга администрация аатыттан номинациялары- бэлиэ ааттары туттардылар.

    Ол курдук "Үрүҥ илгэни үрүлүтээччи" диэн аат Петров Егор Филипповичка, "Удьуор утумун салҕааччы" -Николаев Михаил Егоровичка, "Төрөлкөй төрүөхтээх хаһаайыстыба Юрий ,Сусанна Николаевтарга, Виктор Плешковка, "Сүөһү, сылгы иэйэхситэ ыал"-Сергей, Мария Константиновтарга, Иннокентий ,Мария Гаврильевтарга,"Кэскиллээх кэтэх хаһаайыстыба"-Петр,Валентина Ивановтарга, Яков Алексеевич Васильевка тиксэн дьиэ-кэргэттэрин түбүктээх үлэлэрэ сыаналанан үөрдүлэр-көттүлэр.
    Түөлбэлэр ыккардыларыгар тыа үлэтигэр анаммыт күрэххэ туох да мөккүөрэ суох "Байылыат" бастакы, иккис "Саһарҕа" уонна үһүс "Кыадаҥда" түөлбэлэр буоллулар. Онтон бүтэһиккэ кэтэһиилээх лотерея оонньонон билиэт атыылаһан сүүйүүгэ тиксэн үөрбүт киһи үксээн тэрээһин үрдүк таһымҥа түмүктэннэ.
    Опубликовано

    «Уруйдан үлэ киһитэ!»

    Тыа хаһаайыстыбатын күнүгэр аналлаах "Уруйдан үлэ киһитэ!" диэн бүгүҥҥү үөрүүлээх тэрээһиҥҥэ нэһилиэкпитигэр тыа хаһаайыстыбата сайдыытыгар сопхуос саҕана үлэлээбит-хамнаабыт уонна билигин да ол үлэттэн илиилэрин араарбакка үлэлии сылдьар дьоммут -сэргэбит мустан үбүлүөйнэй бэлиэ күннээх бэтэрээн үлэһиттэрбитин сэргэ остуол оонньуутугар Саха сирин маастарын аатын ылбыт нэһилиэк киэн туттар спортсменнарын чиэстээтибит.

    Ол курдук, 80 сааһын туолан аарыма кырдьаҕас аатын сүкпүт Егоров Н. И. "Бүлүү улууһун бочуоттаах бэтэрээнэ" бэлиэни уонна 70 сааһын туолбут Калачиков Н.С. Чочу нэһилиэгин администрациятыттан Эҕэрдэ суругун, сыаналаах бэлэҕи туттулар.

    Онтон биир дойдулаахтарбыт М.А.Николаева уонна И.Е. Николаев Бүлүү улууһун аатын Саха сирин остуол оонньууларын араас таһымнаах күрэхтэригэр элбэх төгүл чиэстээхтик көмүскээн успуорт Маастарын үрдүк аатын ылбыттарынан нэһилиэкпит дьаһалтатын аатыттан 15.000 суммалаах сертификатын уонна "Нэһилиэк киэн туттуута" диэн кубогы тутан, мустубут дьон истиҥ эҕэрдэтин истэн үөрдүлэр-көттүлэр.
    Тэрээһиҥҥэ Н. М. Прокопьев уонна К. Н. Николаева фотоархивтарыттан элбэх интэриэһинэй хаартыскалар туһаныллан интэриэһи тартылар.Бэтэрээннэрбитигэр, спортсменнарбытыгар өссө төгүл махталы кытта, эҕэрдэни сэргэ, чөл-чэгиэн туругу, ситиһиилэри уонна дьолу-соргуну баҕарабыт!